സ്വന്തം ലേഖകൻ
ന്യൂഡൽഹി: കോവിഡ് വാക്സിനേഷൻ മൂലമാണ് യുവാക്കളിൽ കുഴഞ്ഞുവീണുള്ള മരണം സംഭവിക്കുന്നത് എന്നത് തെറ്റിദ്ധാരണയാണെന്ന് കേന്ദ്ര ആരോഗ്യ മന്ത്രാലയം. ജീവിതശൈലിയും മുൻകാല രോഗാവസ്ഥകളുമാണ് കാരണമെന്നാണ് ആരോഗ്യ മന്ത്രാലയം ചൂണ്ടിക്കാട്ടുന്നത്. ഇന്ത്യൻ കൗണ്സിൽ ഓഫ് മെഡിക്കൽ റിസർച്ചും (ഐസിഎംആർ) എയിംസും സംയുക്തമായി നടത്തിയ പഠനം ഇതു വ്യക്തമാക്കുന്നതായി ആരോഗ്യമന്ത്രാലയം പ്രസ്താവനയിലൂടെ അറിയിച്ചു. മരണകാരണം വാക്സിനേഷനാണെന്നുള്ള ആരോപണങ്ങൾക്ക് ശാസ്ത്രീയ സമവായത്തിന്റെ പിന്തുണയില്ലെന്നും ആരോഗ്യമന്ത്രാലയം വ്യക്തമാക്കി.
കർണാടകയിൽ ഒരു മാസത്തിനിടെ 20 പേർ ഹൃദയാഘാതത്തെത്തുടർന്നുമരിച്ച സംഭവത്തിനു പിന്നിൽ കോവിഡ് വാക്സിനാണെന്ന സംശയം മുഖ്യമന്ത്രി സിദ്ധരാമയ്യ ഉന്നയിച്ചതോടെയാണ് വിശദീകരണമുണ്ടായത്. അതിവേഗത്തിൽ കോവിഡ് വാക്സിന് അനുമതി നൽകി വിതരണം ചെയ്തത് ചിലപ്പോൾ മരണങ്ങൾക്ക് കാരണമായിട്ടുണ്ടാകാമെന്നും വാക്സിനുകളുടെ പാർശ്വഫലങ്ങൾ പഠിക്കുന്നതിനായി ഒരു പാനൽ രൂപീകരിക്കുന്നതായും സിദ്ധരാമയ്യ എക്സിൽ കുറിച്ചിരുന്നു. പിന്നാലെയാണ് സംയുക്ത പഠനം ചൂണ്ടിക്കാട്ടി കേന്ദ്രം രംഗത്തുവന്നത്.
19 സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും 47 ആശുപത്രികളിലാണ് എയിംസുമായി സഹകരിച്ച് ഐസിഎംആർ പഠനം നടത്തിയത്. 2021 ഒക്ടോബറിനും 2023 മാർച്ചിനും ഇടയിൽ ആരോഗ്യവാനായിരുന്ന, എന്നാൽ പെട്ടെന്നു മരിച്ച വ്യക്തികളെ കേന്ദ്രീകരിച്ചായിരുന്നു പഠനം.
2023 മേയ് മുതൽ ഓഗസ്റ്റ് വരെയും ഇത്തരത്തിൽ പഠനം നടത്തിയിരുന്നു. ജനിതകരോഗ സാധ്യത, ജീവിതശൈലി, മുമ്പുണ്ടായിരുന്ന അവസ്ഥകൾ, കോവിഡിനു ശേഷമുള്ള സങ്കീർണതകൾ എന്നിവയുൾപ്പെടെ നിരവധി ഘടകങ്ങൾ പെട്ടെന്നുള്ള ഹൃദയാഘാത മരണങ്ങൾക്കു കാരണമാകാമെന്നാണ് പഠനത്തിന്റെ കണ്ടെത്തൽ. ഈ വിഷയത്തിൽ ഐസിഎംആറും നാഷണൽ സെന്റർ ഫോർ ഡിസീസ് കണ്ട്രോളും (എൻസിഡിസി) ഗവേഷണങ്ങൾ തുടർന്നുവരികയാണ്.